Oaivegávpotguovllu sámiide viimmat fásta deaivvadanbáiki
Govva: YLE / Teija Lassi
Mátta-Suoma sámit leat viimmat ožžon fásta deaivvadanbáikki Helssegis. Doaibmabáikki lea sámiide fállan ođđa ovttasbargoguoibmi, suomaruoŧŧelaš kultursearvi Arbetets Vänner i Sörnäs.
Virggálaččat fásta ovttasbargu álggii mannan lávvardaga álbmotčoahkkimis, man ledje ordnen Sámedikki ođđa áirras Pirita Näkkäläjärvi, City-Sámit -searvi ja Arbetes Vänner -searvi.
Doaibmabáiki lea Porinties, Munkkiniemi gávpotoasis Helssegis. Vuosttas doaibma ođđa báikkis lea sámi orrunlatnja, mii lea álggus rabas oktii mánotbajis. Orrunlanja ulbmilin lea fállat lunddolaš sámegielat birrasa Mátta-Suoma sámiide deaivvadit, oahpásmuvvat ja ságastallat sámiid áššiin.
Sámi orrunlatnja rahpasa sotnabeaivve guovvamánu 19. beaivve.
YLE Sápmi